Pepsi စက်ရုံတာဝန်ရှိသူတွေကို အလုပ်သမားကတရားစွဲဆိုမှု တိုင်းတရားရုံးကိုလွှဲ
ဇူလိုင် ၂၇ ရက်
အရုဏ်ဦး၊ Migrant Times
- မှော်ဘီမြို့နယ်ရှိ Pepsiအချိုရည်စက်ရုံမှတာဝန်ရှိသူတွေကို အလုပ်ခန့်ထားမှုဆိုင်ရာသဘောတူစာချုပ်နဲ့မကိုက်ညီဘဲအလုပ်ထုတ်တာနဲ့ပတ်သက်လို့ ကာယကံရှင်အလုပ်သမားက ခရိုင်တရားရုံးမှာတရားစွဲဆိုထားမှုကို တိုင်းတရားရုံးမှာ ညှိနိူင်းဖို့ မနေ့က အမိန့်ချလိုက်တယ်လို့ အဲဒီအလုပ်သမားအရေးကူညီနေတဲ့ သွေးစည်းညီညွတ်သောသမဂ္ဂများအဖွဲ့ချုပ်(STUM)ထံက သိရပါတယ်။အဲဒီတရားစွဲဆိုမှုနဲ့ပတ်သက်လို့ တတိယ မြောက် ရုံးချိန်းကို မနေ့က ခေါ်ယူခဲ့တာဖြစ်ပြီး အလုပ်ရှင် အလုပ်သမား နှစ်ဖက်ကို ခရိုင်တရားသူကြီးက လက်ခံစစ်မေးခြင်းပြုလုပ်ခဲ့တယ်လို့ဆိုပါတယ်။စက်ရုံဘက်က လုပ်ငန်းရှင် မှ CEO နဲ့ HR ကိုယ်စား HR ကို တရားဝင် ကိုယ်စားလှယ် လွှဲအပ်ခဲ့ပြီး အလုပ်သမားဖြစ်သူဦးသောင်းဟန်က ကိုယ်တိုင်တက်ရောက်ခဲ့တယ်လို့သိရပါတယ်။
- “အမှန်တရားအတွက်အဆုံးထိ ရင်ဆိုင်သွားမယ်”လို့ တရားစွဲဆိုသူဦးသောင်းဟန်က ပြောကြားပါတယ်။အဲဒီရုံးချိန်းမှာ တရားမ စေ့စပ်ညှိနှိုင်းရေးလုပ်ထုံးလုပ်နည်းအရ ဩဂုတ်လ ၁၄ရက် မနက် ၁၀ နာရီမှာ တိုင်းတရားရုံးဆီ နှစ်ဖက် ညှိနှိုင်းဖို့ ရုံးချိန်းပေးခဲ့တာဖြစ်ပြီး လုပ်ငန်းရှင်ဘက်မှ ညှိနှိုင်းရန်မလိုဘဲ အမှုကို ဆက်စစ်ရန် တောင်းဆိုခဲ့တယ်လို့ STUMရဲ့ထုတ်ပြန်ချက်မှာဖော်ပြထားပါတယ်။ဒါပေမဲ့ ခရိုင်တရားသူကြီးက အလုပ်ရှင်တောင်းဆိုချက်ကိုလက်မခံဘဲ တရားရုံး လုပ်ထုံး လုပ်နည်းအတိုင်း သွားဖို့ ဆုံးဖြတ်ပြီး ဩဂုတ်လ ၁၄ ရက်နေ့ တိုင်းတရားရုံးမှာ နှစ်ဖက် ညှိနှိုင်း ရလဒ်ကို စက်တင်ဘာ ၁၄ ရက်မှာ ပြန်လည်တင်ပြရန် အမိန့်ချလိုက်တယ်လို့ဆိုပါတယ်။မနေ့ကရုံးချိန်းမှာ မှော်ဘီခရိုင်တရားရုံးသို့ Pepsi အချိုရည်စက်ရုံမှ မတရားအလုပ်ထုတ်ခံခဲ့ရတဲ့အလုပ်သမားတွေနဲ့ STUM မှ သမဂ္ဂအဖွဲ့ဝင်များက ဦးသောင်းဟန်အား ဝန်းရံခဲ့ကြသလို ဩဂုတ်လ ၁၄ရက်မှာလည်း တိုင်းတရားရုံးမှာ ဆက်လက် ဝန်းရံ ပံ့ပိုးမယ်လို့ STUMက ဆိုပါတယ်။
