ပြည်ပအလုပ်အကိုင်အေဂျင်စီတွေရဲ့ လိုင်စင်အာမခံကြေး လျာထားချက်ထက် လျှော့ပေးဖို့ အေဂျင်စီတွေ အဆိုပြု
အောက်တိုဘာ ၂၂ ရက်
အရုဏ်ဦး၊ Migrant Times
- ပြည်ပအလုပ်အကိုင်အကျိုးဆောင်အေဂျင်စီတွေရဲ့လိုင်စင်အာမခံကြေး တိုးကောက်မယ့်ကိစ္စနဲ့ ပတ်သက်လို့မူလလျာထားချက်ထက် လျှော့ပေးဖို့ မြန်မာပြည်ပအလုပ်အကိုင်ဝန်ဆောင်မှုလုပ်ငန်းရှင်များအဖွဲ့ချုပ်(MOEAF)က တင်ပြထားတယ်လို့ အေဂျင်စီလုပ်ငန်းရှင်တွေဆီက သိရပါတယ်။စစ်ကောင်စီအလုပ်သမားဝန်ကြီးဌာနက ပြည်ပအလုပ်အကိုင်အကျိုးဆောင်အေဂျင်စီတွေဆီက အာမခံကြေး ကျပ်သိန်း ၂၅၀ အစား ကျပ်သိန်း ၁,၀၀၀နဲ့ပြည်ပအလုပ်အကိုင်အကျိုးဆောင် (ထိုင်း)လိုင်စင်အတွက် အာမခံကြေး ကျပ်သိန်း ၅၀ အစား ကျပ်သိန်း ၂၀၀ တိုးကောက်ဖို့ပြင်ဆင်နေတာဖြစ်ပါတယ်။
- အဲဒါနဲ့ပတ်သက်လို့ ပြည်ပအလုပ်အကိုင်အကျိုးဆောင်လိုင်စင်အာမခံကြေးကို ကျပ်သိန်း ၄၀၀နဲ့ ထိုင်း လိုင်စင်အတွက် ကျပ်သိန်း ၁၀၀ ပဲ ပြောင်းလဲသတ်မှတ်ပေးဖို့ MOEAF က ပြန်လည်တင်ပြထားတာလို့ အေဂျင်စီလုပ်ငန်းရှင်တစ်ဦးက ဆိုပါတယ်။” ဌာနက ဘယ်လိုဆုံးဖြတ်မယ်တော့မသိရသေးဘူး။အေဂျင်စီတွေဘက်က အဆိုပြုနှုန်းကိုတော့ ပြန်ပြောထားတယ် ” လို့ သူက ပြောပါတယ်။
- အဲဒီလို အာမခံကြေးတိုးမြှင့်ဖို့အတွက် ဇူလိုင်လမှာ ပြုလုပ်တဲ့ ပြည်ပတွင် အလုပ်လုပ်ကိုင်မှုကြီးကြပ်ရေးကော်မတီအစည်းအဝေးနဲ့ စက်တင်ဘာလက ပြည်ပအလုပ်အကိုင်ဝန်ဆောင်မှုလုပ်ငန်းရှင်များအဖွဲ့ချုပ် (MOEAF)အစည်းအဝေးတို့မှာ ဆွေးနွေးဆုံးဖြတ်ထားတာလို့ အလုပ်သမားဝန်ကြီးဌာနက ထုတ်ပြန်ထားပါတယ်။အဲဒီလို အာမခံကြေးတိုးမှာနဲ့ပတ်သက်လို့ MOEAFရဲ့သဘောထားကိုလည်း အောက်တိုဘာလ၂၀ ရက်ကတောင်းခံခဲ့တာကြောင့် ပြန်ပြီးအကြောင်းပြန်ထားတာလို့ဆိုပါတယ်။လက်ရှိမှာ ပြည်ပအလုပ်အကိုင်အကျိုးဆောင်လိုင်စင်ရယူထားတဲ့ အေဂျင်စီ ၄၇၀ နီးပါးအထိ ရှိနေတာပဲဖြစ်ပါတယ်။လွန်ခဲ့တဲ့ နှစ်နှစ်ကျော်က ပြည်ပအလုပ်အကိုင် အေဂျင်စီ ၃၀၀ လောက်သာရှိပြီး နှစ်ပိုင်းအတွင်းအေဂျင်စီရာချီတိုးလာတာဖြစ်ပါတယ်။
