တိုက်ပွဲကြောင့် မဲဆောက်ကိုသွားရောက်စစ်ဘေးရှောင်ပြည်သူတွေ နေရပ်ပြန်
ဧပြီ ၂၃ရက်/Migrant Times
- မြဝတီမြို့ အမှတ်( ၂) ချစ်ကြည်ရေးတံတားအနီးတိုက်ပွဲနဲ့ လေကြောင်းတိုက်ခိုက်တာကြောင့် ထိုင်းနယ်စပ်၊မဲဆောက်မြို့ဘက်ခြမ်းကနေ ထွက်ပြေးခဲ့ကြတဲ့ စစ်ဘေးရှောင်ပြည်သူတွေ နေရပ်ကို တဖြည်းဖြည်းပြန်နေကြပြီဖြစ်တယ်လို့ ထိုင်းသတင်းဌာန The Reporters က ဧပြီ ၂၂ရက်မှာ ဖော်ပြပါတယ်။မြဝတီမြို့ပေါ်ကို တိုက်လေယာဥ်နဲ့ ဗုံးကြဲတိုက်ခိုက်တာတွေ၊ လက်နက်ကြီးပစ်ခတ် တိုက်ခိုက်တာတို့ကြောင့် ဒေသခံပြည်သူတွေမှာ ထိုင်းနိုင်ငံ၊ မဲဆောက်မြို့ဘက်ကို တိမ်းရှောင်ခဲ့ကြရာ လက်ရှိမှာ တိုက်ပွဲရပ်တန့်သွားပြီးနောက် ဧပြီ ၂၂ ရက်မှာ နေရပ်ကို လူဦးရေ ၇၉၁ ဦး ပြန်သွားခဲ့တယ်လို့ သိရပါတယ်။ဒါပေမယ့် ယာယီစခန်းတစ်ခုမှာတော့ မြဝတီမြို့ကနေ စစ်ဘေးရှောင် ၉၀၆ ဦးမှာ ဆက်လက်ရှိနေဆဲဖြစ်တယ်လို့ The Reporters က ဖော်ပြပါတယ်။ဒါ့အပြင် ထိုင်းသတင်းဌာနတွေရဲ့ ကနဦးဖော်ပြချက်တွေအရ မဲဆောက်ဘက်အခြမ်း စစ်ဘေးရှောင်ယာယီကယ်ဆယ်ရေးစခန်း ၅ ခုမှာ မြန်မာပြည်သူ ၃၀၀၀ ကျော် တိမ်းရှောင်နေရတယ်လို့ ဆိုပါတယ်။
(ထိုင်းနိုင်ငံဘက်ခြမ်းမှ မြဝတီဘက်ကို ပြန်နေတဲ့ စစ်ဘေးရှောင်ပြည်သူတွေ။ဓါတ်ပုံ-The Reporters)
